اللي ما يعرف طعم الوفاء

أحيانًا ما توجعك الخيانة بقدر ما يوجعك نكران الجميل ، تتعب، وتبذل، وتعطي من قلبك، وفي النهاية تكتشف إن الوفاء صار عملة نادرة… وإن اللي كنت تعتبره شريك وسند، ما عرف يوم معنى العشرة ولا حفظها .

اللي ما يعرف طعم الوفاء، ما يحس بقيمة العشرة ولا يفهم معنى الصدق في العلاقات ، يعيش بعمرٍ طويل، لكن قلبه ناقص إحساس ، يعطي اليوم ويأخذ غداً، وكأن الأيام مجرد تبادل مصالح، لا مشاعر ولا مواقف عنده تبقى .

كنت أظن إن العشرة تصنع الوفاء، وإن الأيام تعلم الناس كيف يحافظون على اللي وقف بجنبهم، لكن اكتشفت إن البعض ما يتعلم ولا يتغيّر، لأن الوفاء مو درس… الوفاء طبع، إمّا يولد معك أو ما تعرف طريقه أبد مهما عشت .

مؤلم إنك تكون صادق في نيتك، نقي في عطائك، وتتفاجأ إن المقابل كان يعد الأيام لينتهي منك ،مؤلم أكثر لما تكتشف إنك كنت تحارب لوحدك، وتدافع عن علاقة الطرف الثاني سلمها للنسيان من زمان .

اللي ما يعرف طعم الوفاء، يبيعك وقت الجد، وينكر كل المواقف اللي خلتك تتعب عشانه ، يتركك كأنك ما كنت يوم سند له ، وكأنك ما سكنت قلبه لحظة. معقوله في ناس تنكر الجميل بسهولة، وتنسى العشرة كأنها ما كانت إلا فصل مؤقت في حياتهم .

لكن الله يعوض، دائماً يعوض، لأن اللي يعرف الوفاء، حتى لو خُذل، يظل شامخ، ما يبدّل طيبته بنكران، ولا يرد الغدر بالغدر ، يكتفي بالصمت، لأن الصمت أحياناً أبلغ من ألف عتاب ، خصوصاً انه حاول الكثير لكي يدافع عن هذه العشرة ولكن بدون فائدة .

الخاتمة  : 

تعلّمت إن العشرة ما تضمن الوفاء، وإن الطيبة ما تخلق الإخلاص في قلبٍ ما عرف يوم معنى الصدق ،  بعض الوجوه كانت تبتسم وفي داخلها نية الرحيل، وبعض القلوب كانت تحفظ اسمك مؤقتًا حتى تجد من يشغل مكانك في يوم من الايام .

لكن ما يوجع فعلاً، إنك ما زلت تتذكر التفاصيل، بينما هم نسوك بكل بساطة، كأنك كنت فصل خفيف في قصة طويلة ما كان لك فيها أي دور في حياتهم .

ومع هذا… تبقى رافع راسك، لأنك كنت صادق، كنت وفيّ لهم ، وهم يعلمون ذلك ، وما في يوم غدرت أو نسيت العشرة اللي كانت بينكم بكل تفاصيلها .

فالمؤمن بالوفاء لا يندم على العطاء، بل يندم على من لم يعرف قيمته . 

“الوفاء ما ينقاس بطول العشرة،

ينقاس بثبات الموقف وقت الغياب ” .

مع السلامة  🌷

💙 دمتم وافين صاينين العشرة 

ونلتقي دومًا على سطور من صدق وإلهام ✨✍️

🍃 إلى لقاء قريب بإذن الله.